കിഴക്കമ്പലം ഗ്രാമപഞ്ചായത്തിന്റെ 2025–2026 സാമ്പത്തിക വർഷത്തെ വാർഷിക പദ്ധതിയിൽ ഉൾപ്പെടുത്തി കർഷകരെ പ്രോത്സാഹിപ്പിക്കുന്നതിനായി നടപ്പിലാക്കിയ വിത്ത് വിതരണ പദ്ധതിയുടെ ഉദ്ഘാടനംകിഴക്കമ്പലം കൃഷിഭവനിൽ വച്ച് നടന്നു. പഞ്ചായത്ത് പ്രസിഡണ്ട് ജിൻസി അജി പദ്ധതി ഉദ്ഘാടനം നിർവഹിച്ചു.
കൃഷിയെ കൂടുതൽ പ്രോത്സാഹിപ്പിക്കുകയും പ്രദേശത്തെ കാർഷിക ഉൽപാദനം വർധിപ്പിക്കുകയും ചെയ്യുക എന്ന ലക്ഷ്യത്തോടെയാണ് ഗ്രാമപഞ്ചായത്ത് ഈ പദ്ധതി നടപ്പിലാക്കുന്നത്. പദ്ധതിയുടെ ഭാഗമായി കർഷകർക്ക് ഇഞ്ചി, മഞ്ഞൾ, ചേമ്പ് എന്നീ പ്രധാന കാർഷിക വിത്ത് ഇനങ്ങളാണ് വിതരണം ചെയ്തത്. പ്രദേശത്തെ ചെറുകിട കർഷകർക്ക് കൃഷിയിലേക്കുള്ള ആത്മവിശ്വാസം വർധിപ്പിക്കാനും കൂടുതൽ ആളുകളെ കാർഷിക രംഗത്തേക്ക് ആകർഷിക്കാനുമാണ് ഈ പദ്ധതി സഹായകരമാകുന്നത്.
കൃഷി മേഖലയെ ശക്തിപ്പെടുത്തുകയും നാട്ടിലെ കാർഷിക സമൃദ്ധി വർധിപ്പിക്കുകയും ചെയ്യുന്നതിനായി പഞ്ചായത്തിന്റെ നേതൃത്വത്തിൽ ഇത്തരം പദ്ധതികൾ തുടർന്നും നടപ്പിലാക്കുമെന്ന് പഞ്ചായത്ത് അധികൃതർ അറിയിച്ചു. നാടിന്റെ കാർഷിക ഉന്നമനത്തിനായി പരിശ്രമിക്കുന്ന കർഷകർക്ക് ഇത്തരം വിത്ത് വിതരണ പദ്ധതികൾ വലിയ ആശ്വാസവും പ്രോത്സാഹനവുമാണ് നൽകുന്നതെന്ന് പരിപാടിയിൽ പങ്കെടുത്തവർ അഭിപ്രായപ്പെട്ടു.
ചടങ്ങിൽ കൃഷി വകുപ്പ് ഉദ്യോഗസ്ഥർ, പഞ്ചായത്ത് അംഗങ്ങൾ, കൃഷിഭവൻ ജീവനക്കാർ, കർഷകർ എന്നിവർ പങ്കെടുത്തു.
