ഒരുകാലത്ത് നമ്മുടെ നാടിന്റെ ജീവനാഡിയും മഴവെള്ള സംഭരണികളുമായിരുന്ന കുളങ്ങൾ, മഴക്കാലത്ത് ശേഖരിക്കുന്ന ജലം വേനൽക്കാലത്ത് കൃഷിക്കും മറ്റ് ആവശ്യങ്ങൾക്കും ഒരുപോലെ ഉപകരിക്കേണ്ടതായിരുന്നു. എന്നാൽ, ദീർഘവീക്ഷണമില്ലാത്ത മുൻ ഭരണകൂടങ്ങളുടെ അനാസ്ഥ കാരണം ഒട്ടനവധി കുളങ്ങൾ മൂടപ്പെട്ടും നശിച്ചുംപോയി. ഈ കെടുകാര്യസ്ഥത ജലക്ഷാമത്തിന് വഴിയൊരുക്കി. ഈ ഗുരുതരമായ പാരിസ്ഥിതിക പ്രശ്നത്തിന് ശാശ്വത പരിഹാരം കാണാനാണ് ട്വന്റി20 ഭരണസമിതി ദീർഘവീക്ഷണത്തോടെ ഇടപെട്ടത്. പഞ്ചായത്തിലെ 77 കുളങ്ങളാണ് ഈ പദ്ധതിയുടെ ഭാഗമായി നവീകരിച്ചത്. മൂടപ്പെട്ടും നശിച്ചും കിടന്നിരുന്ന എല്ലാ കുളങ്ങളെയും അളന്നുതിരിച്ച്, ചെളി നീക്കം ചെയ്ത്, കരിങ്കല്ലുകൊണ്ട് വശങ്ങൾ ഉറപ്പിച്ചും, സുന്ദരമായ കൈവരികൾ സ്ഥാപിച്ചും ട്വന്റി20 അവയെ പുതിയ ജീവനുറവകളാക്കി മാറ്റി. പഴമയുടെ സ്മരണ നിലനിർത്തിക്കൊണ്ട് ആധുനികതയും സൗന്ദര്യവും കൂട്ടിച്ചേർത്ത ഈ സമീപനം ജനകീയ പങ്കാളിത്തത്തോടെയുള്ള വികസനത്തിൻ്റെ ഉത്തമ ഉദാഹരണമാണ്.
ട്വന്റി20യുടെ ഈ കുളം നവീകരണ പദ്ധതി പ്രദേശത്തിൻ്റെ പരിസ്ഥിതി പുനരുജ്ജീവനത്തിൽ വലിയൊരു നേട്ടമായി മാറി. ഇന്ന് ഈ കുളങ്ങൾ കുട്ടികൾക്ക് നീന്തൽ പഠിക്കാനും, മത്സ്യകൃഷിയെ പരിപോഷിപ്പിക്കാനും, കാർഷിക ആവശ്യങ്ങൾക്കും ഉപയോഗിക്കുന്നു. ഏറ്റവും പ്രധാനം, ഈ കുളങ്ങൾ വേനൽക്കാലത്തും വറ്റാതെ നിലനിൽക്കുന്നത് കൊണ്ട് തന്നെ അടുത്തുള്ള വീടുകളിലെ കിണറുകളിലും ജലനിരപ്പ് ഉയർന്ന് വറ്റാത്ത അവസ്ഥയുണ്ടാക്കുന്നു എന്നതാണ്. ജലസുരക്ഷാ രംഗത്തും പരിസ്ഥിതി സംരക്ഷണത്തിലും ട്വന്റി20 നടപ്പിലാക്കിയ ഈ മാതൃകാപരമായ വികസനം, താൽക്കാലിക പരിഹാരങ്ങൾക്കപ്പുറം തലമുറകൾക്ക് ഉപകരിക്കുന്ന പദ്ധതികൾക്ക് എങ്ങനെ രൂപം നൽകാം എന്നതിൻ്റെ പാഠപുസ്തകമാണ്.
